AVISO:

Pedimos disculpas polo retraso á hora de publicar as fotos dalgunhas actividades feitas ao final do curso pasado. En ocasións, cando o traballo supera a realidade, vémonos na obriga de priorizar.

EN NOVEMBRO CONTAMOS CO PAI DE IRIS

 Remata o mes de novembro, e visita o noso sofá Andrés Pereiro, pai de Iris, a nosa compañeira de 2º de Primaria. Vén acompañado dunha fermosa historia titulada "A cociñeira do Rei".
 Teremos que preparar algunha receita? Que sorpresas nos agardarán arredor do noso sofá?
 Pois a verdade é que a tarde deu para moito. Tivemos un pouquiño de todo: conto, canción, fixemos de axudantes de cociña...
 Mentres Andrés contaba o relato , a súa filla Iris íanos ensinando as diferentes ilustracións do conto (que compenetrados estaban!).
 A protagonista chamábase Mencía e tiña que preparar un menú para o Rei, e así poder ser a súa cociñeira. Tiña moita competencia! Pero ela levaba preparados uns ingredientes máxicos, que a súa avoa lle contara:

"O ben feito sempre é de proveito, e se ademais é aderezado con ILUSIÓN, AGARIMO e LEDICIA..."
 Xa vedes eses son os "ingredientes máxicos", que non só se empregan na cociña, tamén en calquera actividade que fagamos na nosa vida.
 Mentres cociñabamos con Mencía, tamén aprendemos unha canción e cada vez que ela engadía algún ingrediente á pota, aí estabamos nós para "metelos ao forno..."(ese foi o noso traballo, ser os"pinches" de Mencía!)
 Para rematar a sesión de animación á lectura, Andrés tíñanos preparada unha pota cos tres ingredientes máis importantes. Coloreámolos, recortámolos e puidemos levalos para casa.

 Lembrade tamén engadilos á vosa vida!

Moitas grazas Andrés. 
Que saibas que cando queiras vir "cociñar" de novo ao noso sofá, estaremos encantados de recibirte; porque como ti nos ensinaches 
"O BEN FEITO SEMPRE É DE PROVEITO".
 Sen dúbida que a túa cociña estivo moi ben elaborada e cunha materia prima de primeira calidade: ILUSIÓN, AGARIMO E LEDICIA. Abofé que o recendo  de ditos ingredientes, perdurará nos nosos "comensais" para sempre. 

APADRIÑAMENTO LECTOR NAS PEDROSAS

  Despois dunha longa camiñata por corredoiras descoñecidas, cun sol de xustiza e en contacto coa natureza, chegamos ao Parque das Pedrosas, lugar da nosa actividade de fomento da lectura.

  Que mellor sitio para ler e escoitar contos que baixo o cobixo deses fermosos carballos.
  Tras repoñer forzas e un breve descanso, tocaba cumprir co compromiso adquirido cos compañeiros de primeiro de Primaria, os nosos afillados lectores. Era o momento de ler!
  Cada padriño buscou ao seu afillado, escolleron unha boa árbore e ao seu pé, comezaron a escoitarse os contos escollidos. Así desa marabilla da natureza e marco incomparable para a nosa xornada, escoitouse o conto de Mariluz Avestruz, Cocorico, Rabietas, Carabuñas, Quen me quere adoptar?... Pola cara dos pequenos de Primaria, a actividade foi un éxito. Éxito para eles e para os maiores, que puideron estrearse na arte de ler e contar.
  Ao remate, fixemos preguntas sobre os contos para ver se estiveran atentos, e rematamos a xornada cos xogos que sempre nos prepara o noso mestre Manuel. Disfrutamos levando auga, facendo equilibrios, voando nun paracaídas...
  Xa estamos desexando que chegue a segunda xornada de apadriñamento lector, a segunda xornada de contos, a segunda xornada de cooperativismo lector. 
  A ler sen parar! Que non se diga!

O CONTO DE SUSA

 Desde que comezara o curso, os nosos alumnos de segundo de Primaria, tiñan moitas gañas de visitar a biblioteca e o seu famoso sofá; así como os alumnos de primeiro, que estaban desexosos  de coñecelo, despois de escoitar falar tanto del e dos contos que alí nacen. 
  Pois ben, que mellor día para estrear os Contos de Sofá 2014-2015 que o "Día internacional das Bibliotecas"!
  Nesta ocasión, a nosa convidada foi Susa, nai de Álvaro e Felipe (que por certo, exerceron de fantásticos axudantes)e que viña cargadiña de agasallos para todos.
  O primeiro deles e o máis importante, foi o fermoso conto de "Cirilo, el cocodrilo", unha fermosa historia chea de sentimentos, tanto positivos como negativos. A verdade é que a cara dos nenos xa o dicía todo.
 Durante o conto, nós puxemos tamén o noso "gran de area", pois Susa preparounos unhas cartulinas para meternos de cheo no relato.

  Participamos na festa de entroido do protagonista e os seus amigos e convertémonos en Cirilo (todos diferentes, pero todos moi importantes).
  Ao rematar o conto, pintamos os debuxos de Cirilo da cor que máis nos gustaba, e tamén pintamos outro agasallo máis que nos trouxo Susa, un marcapáxinas.
  Moito traballaches, Susa!

  Aínda había unha última sorpresa máis! Os seus fillos, Felipe e Álvaro, agasalláronnos cun exemplar do libro para que gardasen Leo e Biblín na nosa biblioteca, e así poder disfrutar del durante todo o curso.
  Como podedes ver nas fotos, foi unha tarde moi divertida.
  Grazas Susa 
polo moito que traballaches para nós;
por presentarnos a Cirilo, o cocodrilo; 
por converter unha tarde de conto 
nunha tarde de sorrisos e aprendizaxes. 
Desde hoxe formas parte
 da nosa pequena gran familia.
Volta cando queiras,
na nosa biblioteca hai un sofá 
agardando por ti.

Dan comezo os CONTOS DE SOFÁ 2014-2015

 Este venres, inauguramos os Contos de Sofá deste 2014-2015, e xa van tres cursos contando relatos a carón do noso xa famoso sofá azul.

 Para esta estrea, eleximos a unha persoa moi especial. Especial para todos nós, pero máis para os nosos compañeiros Álvaro e Felipe, que abofé que a coñecen ben e a queren moito. 

 Trátase de Susa Penido, a súa nai, que ven cun conto baixo o brazo, moi, pero que moi fermoso. Chámase...

 Síntoo moito, pero xa sabedes que ata o venres non me deixan contar nada. Intentade ver se estes día á hora do recreo conseguides que Álvaro e Felipe vos adianten algo, mentras tanto, agardamos ansiosos a que Susa sente no noso sofá.

 Vémonos o venres pola tarde na biblioteca, non faltedes, porque Leo e Biblín pasarán lista. 

 Bicos e boas lecturas para todos.

Novo curso de APADRIÑAMENTO LECTOR

 Primeiro día de curso e xa  traballando?

 Non podía ser doutro xeito. Os nenos e nenas de 6º de Primaria ao igual que os seus compañeiros de 1º de Primaria, estaban desexando comezar o apadriñamento lector canto antes.

 Tras o éxito que tivo dita actividade de fomento da lectura o curso pasado, as titoras Marisol Asorey e Ana Cerdeira, decidiron non agardar máis e poñerse mans a obra, elaboraron os contratos de apadriñamento e a asinalos.
 A biblioteca foi o lugar escollido para que os alumnos de sexto fixesen de padriños e madriñas lectoras dos nenos e nenas de primeiro.
 Estos últimos, recén aterrados nunha nova e longa etapa, Primaria, víronse envoltos nun solemne acto, onde asinaron un contrato polo cal adquiren o compromiso  de portarse ben cando os seus padriños lles lean, escoitalos con atención e disfrutar da arte de ler. Os veteráns de Sexto, comprométense a lerlles entretidos contos e a intentar que o gusto pola lectura xermole nos máis pequerrechos.

 Os contratos quedaron asinados e as apertas dadas, xa tan só quedaba o máis importante... comezar a ler.

 Como se non fose abondo, os valentes de 6º atrevéronse a lerlles dous contos improvisados. Estas primeiras lecturas foron:
  • The Foggy Foggy Forest(Nick Sharrat) 
  • O Coelliño Branco(Xosé Ballesteros- Óscar Villar).


 Aquí vos deixamos a lista dos padriños e madriñas cos seus afillados e afilladas:

  • Laura, Si Yu e Qin Yunfei.
  • Javier, Zalo e Leandro.
  • Guille, Carlos e Millán.
  • Patri G, Noa e Area.
  • Noel, Lois e Felipe.
  • Patri Quinteiro, María e Aroa Filloi.
  • Xoel, Iago  e Millán Luaces.
  • Lucía e Alba Matanzas.
  • Zayra e Sara.
  • Antía e Alba Moares.
  • Matías, Elvis e Nicolás.
  • Rubén e Martín.
 Todos os nenos agardan a súa próxima xuntanza para ler, disfrutar e soñar a través dos relatos.
 Agardamos que o curso sexa rico en contos e que esta relación literaria perdure no tempo. 
 

FINA CASALDERREY visita o noso centro.

 O outro día recibimos a visita dunha artesá das palabras, dunha creadora de soños. Unha escritora profesional e esixente, doce e amable, que soubo captar a nosa atención en todo momento.

 Recibimos a visita de Fina Casalderrey, unha visita moi especial. Sabiades que se non é por nós e outros nenos, ela non sería famosa? Así é. Fina contounos o importante que somos para todos os escritores, porque se non lemos os seus libros... eles non serían nada. Que importantes nos sentimos, despois das súas fermosas verbas!

 Pois eso foi o que fixemos durante este curso, ler e disfrutar dos seus libros. Os de primeiro e segundo de Primaria, elexiron "Un saco de estrelas"; os de terceiro e cuarto, escolleron "Quen me quere adoptar?"; e os maiores leron "Ás de mosca para Anxo."
 Descubrimos que nacera nunha biblioteca, que aos dous anos xa lía e escribía e que no seu fogar non había xoguetes, tan só libros e máis libros... Ao remate, soubemos que fora unha pequena mentira que ela contara.
 Fina lembrounos o importante que son as palabras e a importancia do seu emprego.Non fai falla que as palabras sexan raras, longas... todas son igual de importantes. Só hai unha receita para empregalas ben, e é ser amable e agarimoso con elas.
 
 Se así o facemos e engadimos un pouquiño de imaxinación, nós tamén poderemos ser grandes escritores no futuro.

Grazas Fina, de seguro que nós pasamos por ti, pero non dubides que ti, quedaches en nós para sempre.